Ko e hā ‘a e hu‘akau pēpē ke te fili mei ai?

‘Oku sai pē ke ke fili ha hu‘akau pēpē ma‘a´ e fanga ki‘i pēpē toki fanau‘i´ (‘from birth‘) ‘a ia ‘e fe‘unga mo ho‘o sēniti´.  ‘Oku ‘ikai ha fakamo‘oni tau‘atāina ia ke hā mei ai pe ko e hu‘akau pēpē mei´ he kautaha fē ‘oku lelei ange ma‘a ho‘o pēpee´.

Fili ha hu‘akau pēpē ‘oku fe‘unga mo e ta‘u motu‘a ‘o ho‘o pēpee´.  ‘E ala puke ‘a ho‘o pēpee´ kapau te ke fafanga‘aki ia ha hu‘akau pēpē ‘oku fakataumu‘a ma‘a´ e kau pēpē ‘oku toe lalahi ange´.

Lau ma‘u pē ‘a e fakahinohino ‘i he tu‘a kapa hu‘akau´, pea muimui pau ki heni.

‘Oku fa‘a fokotu‘u atu ke ngāue‘aki ‘a e hu‘akau pēpē ngaohi mei´ he hu‘akau pulu´ ki he fanga ki‘i pēpē mo‘ui lelei ‘oku ‘ikai fakahuhu´.

Kapau ‘oku´ ke pehē ‘oku kau kovi ‘a e hu‘akau pulu´ ki ho‘o pēpee´, talanoa mo ho‘o mā‘uli´ (pe ko ha taha faifā‘ele kehe) pe ko e neesi Palaniketi´ (Well Child nurse) kimu‘a pea´ ke toki fakatau ha kalasi hu‘akau kehe.